WATEULE 'EJAT' MWAKA 2023/2024 HAWA HAPA

                                

TAARIFA KWA VYOMBO VYA HABARI

Dar es Salaam, Alhamis, Septemba 19, 2024

 MAJAJI saba wa Tuzo za Umahiri wa Uandishi wa Habari Tanzania (EJAT) wamehitimisha kazi ya kutathmini ubora na weledi wa kazi zipatazo 1,135 na kuwateua waandishi wa habari 72 watakaoingia katika kinyang’anyiro cha kumtambua mshindi wa kwanza, wa pili na wa tatu na mshindi wa jumla.

Kati ya waandishi wa habari 72, wanaume ni 45 (sawa na 62.5%) na wanawake 27 (sawa na 37.5%). Kati ya wateule hao, wateule 14 (19%) wanatoka katika runinga; 13 (18%) wanatoka vyombo vya mtandaoni, redio 20 (28%) na wateule 25 (35%) wanatoka kwenye magazeti.

Wateule wamepatikana kwa kukidhi vigezo vya ubora ambavyo ni pamoja na ukweli, usahihi, uanuai, haki, kina, utafiti, ubunifu, uvumbuzi, upekee, uchambuzi, uwajibikaji, ufichuaji maovu, uadilifu, uwasilishaji unaoeleweka na uchunguzi. Ifahamike pia kwamba vigezo maalum vilitumika kuzingatia aina tofauti ya vyombo vya habari kama vile redio, televisheni, magazeti na habari za mitandaoni.

Kabla ya kutaja majina ya wateule hao 72 ni muhimu ifahamike kwamba kinyang’anyiro cha kumtambua mshindi wa kwanza, wa pili na wa tatu na mshindi wa jumla kwa makundi 20 ya kushindaniwa kitakuwa siku ya Jumamosi, tarehe 28 Septemba, 2024 ambapo mgeni rasmi katika siku ya kilele cha kinyang’anyiro atakuwa ni Spika wa Bunge la Jamhuri ya Muungano wa Tanzania na Rais wa Mabunge Duniani, Dkt Tulia Akson.

Mgeni rasmi ndiye atakayemkabidhi tuzo mshindi wa jumla atakayewapiku kwa umahiri waandishi wengine 71 katika hafla itakayofanyika katika ukumbi wa Aga Khan Daimond Jubilee, Dar es Salaam. Hii itakuwa ni mara ya 15 kutoa tuzo za umahiri wa uandishi wa habari Tanzania.

Moja ya jambo la kipekee katika kilele cha kinyang’anyiro hicho ni pamoja na kusikia kutoka kwa jopo la majaji kuhusu viwango vya uandishi wa habari za magazeti, redio, televisheni na mitandaoni  kwa habari zilizohusu uwekezaji wa kampuni ya DP world katika bandari za Tanzania, habari kuhusu Ngorongoro na wamasai na kuhusu maporomoko ya Hanang.

Jambo la pili la kipekee ni kumshuhudia Waziri wa Habari, Mawasiliano na Teknolojia ya Habari, Mheshimiwa Jerry Silaa akizindua Jarida la Tuzo na Tuzo magazine ambayo yanajikita kuhamasisha umahiri katika sekta mbalimbali Tanzania na nje ya Tanzania. Kwa kuanzia majarida hayo, moja la Kiswahili na lingine la Kiingereza yatabeba maudhui ya tuzo za umahiri wa uandishi wa habari Tanzania (EJAT).

Moja ya maudhui katika majarida yote mawili ni simulizi ya maisha ya wateule wote. Kazi ya kuandika simulizi hizo inaanza leo, hivyo wateule wote wawe tayari kufikiwa na waandishi wa Jarida la Tuzo wakati wowote kuanzia sasa. Maudhui mengine ni ya wafadhili wa tuzo ambao simulizi zitahusu mchango wao katika kubadilisha maisha ya watu ikiwemo kukuza na kujenga tasnia ya habari.

Aidha ikumbukwe kuwa kwa mara ya kwanza kazi za kihabari kwa EJAT 2023 zimeongezeka hadi 1,135 kutoka kazi 893 za EJAT 2022. EJAT 2020 kazi zilikuwa 396 na EJAT 2021 kazi zilikuwa 608.

Waandishi wa habari wa mkoa wa Dar es Salaam kwa mwaka huu waliongoza kwa kuwasilisha kazi 290, wakifuatiwa na mkoa wa Arusha uliokuwa na kazi 81, Mwanza kazi 74, Iringa ilishika nafasi ya nne kwa kuwa na kazi 72, wakati mkoa wa Mtwara ulishika nafasi ya tano kwa kuwa na kazi 49.  Kwa upande wa Zanzibar, kazi zilizopokelewa ni kutoka Kaskazini Pemba (36) Pemba Kusini (43) na Mjini Magharibi (29).

Dirisha la kupokea kazi za waandishi wa habari lilifunguliwa tangu Novemba 15,  mwaka jana na kufungwa Februari 28, mwaka huu. Kazi ya kuchambua na kutathmini ubora wa kazi za kihabari za mwaka 2023 ilianza tarehe 7 hadi 15 baada ya Naibu msajili wa mahakama kuu, Morogoro, Mheshimiwa Fadhil Mbelwa kuwaapisha majaji.

Jopo la Majaji liliongozwa na Halima Shariff, katibu wake Dkt Egbert Mkoko na majaji wengine wakiwa ni pamoja na Ndugu Mkumbwa Ally, Eshe Muhiddin, Jeniffer Sumi, Halima Msellemu na Absalom Kibanda.

Jopo lilichaguliwa na wakuu wa taasisi za kihabari zinazounda kamati ya maandalizi ya EJAT kwa kuzingatia uadilifu, ujuzi na uzoefu katika uandishi wa habari, uwezo wa kuchambua na kutoa tathmini sahihi, uelewa wa mabadiliko ya kidigitali, uzoefu wa kimataifa au wa kijamii.

Aidha, jopo la majaji lilizingatia uwiano wa kizazi kipya na cha zamani, waliopo kazini na waliostaafu, wabobezi wa maudhui mahsusi, usawa wa kijinsia, uwakilishi wa Zanzibar na Tanzania Bara na uwakilishi wa aina ya vyombo vya habari (magazeti, redio, luninga na  mitandao).

Mbali na Tuzo za Umahiri wa Uandishi wa Habari, mchakato wa kumtafuta mshindi wa Tuzo ya Maisha ya Mafanikio Katika Uandishi wa Habari (LAJA) 2024 unatarajiwa kuhitimishwa leo na wakuu wa kamati ya maandalizi. Tuzo hii humtambua mwandishi ambaye katika maisha yake ametoa mchango mkubwa katika kuiendeleza tasnia ya habari.

Taasisi zinaounda Kamati ya Maandalizi ni Wakfu wa Vyombo vya Habari (TMF), Chama Cha Waandishi wa Habari Wanawake Tanzania (TAMWA), Jukwaa la Wahariri (TEF), HakiElimu, Umoja wa Waandishi wa Habari za Mazingira (JET), Umoja wa Klabu za Waandishi wa Habari Tanzania (UTPC), Umoja wa Wamiliki wa Vyombo vya Habari Tanzania (MOAT), Sikika, Misa –  Tan  na Twaweza.

Sasa nimalizie kwa kusoma orodha ya wateule wa EJAT 2023 pamoja na vyombo vyao:

NA.	JINA	JINSIA	CHOMBO	MKOA
1	Thomas Masalu Lunyalo	M	Mazingira FM	Mara
2	Abdallah Bakari Nassoro	M	Nipashe	Mtwara
3	Jacob Mogesi Musenda	M	The Citizen	Dar es Salaam
4	Marco Maduhu	M	Shinyanga Press Club	Shinyanga
5	Salum Vuai Issa	M	Zanzibar Leo	Zanzibar
6	Jackline Victor Kuwanda	F	The Chanzo	Dodoma
7	Stanslaus Lambert	M	Swahili 360	Dar es Salaam
8	Zacharia Nyamoga	M	IPC Mkombozi TV	Iringa
9	Irene Mwakalinga	F	TBC1	Iringa
10	Said Ally Sindo	M	Storm FM	Geita
11	Joshua Stephen	M	Nukta	Dar es Salaam
12	Samweli Mpogole	M	Highlands FM	Mbeya
13	Shekha Suleiman	F	ZBC	Pemba
14	Abel Kilumbu	M	Dar 24	Dar es Salaam
15	Khamis Mohamed	M	Zanzibar Leo	Zanzibar
16	Abdiel Jumanne Siffi	M	UFM	Dar es Salaam
17	Julius Maricha Maricha	M	The Citizen	Dar es Salaam
18	Eliya Solomon	M	Mwanaspoti	Dar es Salaam
19	Huwaida Nassor Moh’d	F	As Salaam FM	Zanzibar
20	Rehema Evance Mwaikema	F	UTV	Simiyu
21	Philip Mwihava Mwihava	M	Clouds FM	Dar es Salaam
22	Zourha John Malisa	F	Mwananchi	Dar es Salaam
23	Linus Ananias Gamarwa	M	TBC	Dodoma
24	Catherine Sekibaha	F	Pangani FM	Pangani Tanga
25	Herieth Makwetta	F	Mwananchi	Dar es Salaam
26	George Helahela	M	Mwananchi	Dar es Salaam
27	Esau Ezra Ng’umbi	M	Nukta Habari	Dar es Salaam
28	Benson Eustace Jacob	M	UTV	Kagera
290	Mariamu Ally Abdallah	F	Pangani FM	Tanga
30	Adam Gabriel Hhando	M	CG FM	Tabora
31	Sanula Renatus Athanas	M	Nipashe	Dar es Salaam
32	Elizabeth Edward Kusekwa	F	Mwananchi	Dar es Salaam
33	Pamela Nasphory Chilongola	F	Mwananchi	Dar es Salaam
34	Rodgers Simon	M	ITV	Dar es Salaam
35	Mukrim Mohamed Khamis	M	KTV TZ Online	Zanzibar
36	Ephrahem Edward Bahemu	M	Mwananchi	Dar es Salaam
37	Mkwaji Reuben Masatu	F	UTV	Dar es Salaam
38	Lukelo Francis Haule	M	The Chanzo	Dar es Salaam
39	Benjamin Mzinga	M	ITV	Dar es Salaam
40	Dickson Shukran Kanyika	M	RFA	Njombe
41	Hamisi Makungu Hamisi	M	Pangani FM	Pangani Tanga
42	Halfan Chusi	M	Nipashe	Dar es Salaam
43	Kelvin Paul Matandiko	M	Mwananchi	Dar es Salaam
44	Waryoba Musa Waryoba	M	Montessory Tanzania	Mwanza
45	Anna Peter  Mbuthu	F	TBC	Arusha
46	Egan Salla	M	BBC	Dar es Salaam
47	Imma Rashid Mbuguni	M	Majira Online	Dar es Salaam
48	Haika E. Kimaro	F	The Citizen	Mtwara
49	Margareth Msafiri Geddy	M	TBC Safari	Dar es Salaam
50	Yohana Chance Challe	M	Mwanaspoti	Mbeya
51	Mgongo Kaitira Mafuru	M	Mwananchi	Mwanza
52	Mercy Yasin Mbaya	F	UTV	Dar es Salaam
53	Imani Raphael Makongoro	F	Mwananchi	Pwani
54	Fatma Abdallah Chikawe	F	UTV	Dar es Salaam
55	Brown Benny Mbwawa	M	Wasafi FM	Mbeya
56	Ayoub Stanley Nyondo	M	Shamba FM	Iringa
57	Warioba Igombe Warioba	M	Uhuru	Mara
58	Salome Gregory Sumbya	F	The Citizen	Dar es Salaam
59	Veronica Natalis Mataba	F	DW Swahili	Arusha
60	Saa Mbwana Zumo	F	Pangani FM	Pangani Tanga
61	Said Ali Ngamba	M	Uyui FM	Tabora
62	Lugendo Madege	M	UFM	Dar es Salaam
63	Anna Potinus	F	Mwananchi	Mwanza
64	Christina Mwakangale	F	Nipashe	Dar es Salaam
65	Rauhiya M Shaban	F	Bomba FM	Zanzibar
66	Hazla Omary Quire	F	The Tanzania Times	Arusha
67	Lucy Patrick Samson	F	Nukta	Dar es Salaam
68	Mohamed Hammie Rajabu	M	Habari Leo	Dar es Salaam
69	Amina Deogratias Semagogwa	F	Radio Kwizera	Kigoma
70	Hellen Nachilongo Mkisi	F	The Citizen	Dar es Salaam
71	Alfred Bulahya Jakuba	M	Dodoma FM	Dodoma
72	Waziri Iddi Suka	M	Tumaini TV	Dar es Salaam

Hongereni sana kuingia katika kinyang’anyiro cha Tuzo za Umahiri wa Uandishi wa Habari Tanzania (EJAT) 2023.

Ernest S. Sungura

Mwenyekiti

Kamati ya Maandalizi ya EJAT 2023