WANANCHI
kisiwani Pemba, wameshauriwa kuitumia Tume ya Kurekebisha sheria wanapokuwa na
vikao vyao vya kupokea maoni, ya kutaka kurekebishwa sheria, ili kuwa na sheria
zinazoendana na dunia ya sasa.
Ushauri huo
umetolewa na wanakongamano la siku moja, la kuelekea siku 16 za kupinga ukatili
na udhalilishaji, lililoandaliwa na Jumuiya ya wasaidizi wa sheria, wilaya ya
Chake chake Pemba ‘CHAPO’, na kufanyika ukumbi wa Chama cha waandishi wa habari
wanawake Tanzania TAMWA-Zanzibar ofisi ya Pemba.
Walisema, ni
vyema wananchi wanapokutana na Tume hiyo, kuacha jazba na kuzitolea maoni
sheria, ambazo zimeshapitwa na wakati, ili kueleza wanavyotaka ziwe, kwa mujibu
wa mazingira ya sasa.
Mjumbe wa
Jumuiya ya TUJIPE Pemba, Sheikh Abdalla Nassor Maulid, alisema utoaji wa maoni katika
tume hiyo, ni njia muhimu kwa jamii kuwa na sheria rafiki.
‘’Tume ya
kurekebisha, hupita katika maeneo yetu, sasa sisi wananchi tuitumieni ili kutoa
maoni, juu ya sheria ambayo tunaihisi imeshapitwa na wakati,’’alieleza.
Kwa upande wake
Abdull-atif Abdalla Salim kutoka ofisi ya Mufti Mkuu, alisema moja ya eneo
ambalo, linaendelea kuwakosesha haki wanawake na ucheleweshaji wa mirathi.
‘’Ijapokuwa
hata sheikh, aliyepo mtaani anaweza kurithisha, lakini ni vizuri zaidi kuitumia
Kamisheni ya Wakfu, kwa ajili ya kurithishwa maana huko hupata waraka ambao unaondoa
migogoro,’’alieleza.
Kiongozi wa
dini ya kikiristo Robart Migua Ndalami, alisema ili uhalifu ukiwemo wa wizi na
udhalilishaji upunguwe, wanaobainika wakijirejea kufanya makosa, waadhibiwe
mara mbili.
Akifungua kongamano
hilo, Mkuu wa Idara ya Katiba na Msaada wa Kisheria Zanzibar ofisi ya Pemba,
Bakari Omar Ali, alisema CHAPO imo katika kuelekae siku 16 za kupinga ukatili
na udhalilishaji, kwa kukutana na viongozi wa dini na wanaharakati wiengine.
Alieleza kuwa,
siku hizi ni muhimu kwa jamii na wadau wingine kuangalia mafanikio na
changamoto, katika kutomeza vitendo vya ukatili na udhalilishaji.
‘’Kongamano hili
ni muhimu mno kwetu, kuona wapi tumefanikiwa na wapi tunahitaji kuongeza nguvu,
ili kuhakikisha kundi la wanawake na watoto, linabaki salama bila ya vitendo
hivyo,’’alieleza.
Mkurugenzi
wa Jumuiya ya Wasaidizi wa sheria wilaya ya Chake chake Pemba ‘CHAPO’ Nassor
Bilali Ali, alisema nguvu za pamoja bado zinahitajika katika jamii, ili kuona
matendo hayo yanakoma.
Hata hivyo
ameikumbusha jamii, kuendelea kuwatumia wasaidizi wa sheria wanapokuwa na
changamoto za kisheria, ikiwemo kukwama kwa kesi Polisi, kuchelewa kuchukuliwa
maelezo baada ya tukio kutokea.
Alieleza kuwa,
zipo taarifa kuwa, huwenda sheria ya Mila inayohusu mavazi ya hapa Zanzibar ya tokea
miaka ya 60, kufanyiwa marekebisho, ili kuona inaendana na mazingira ya sasa.
Kaimu Mwenyekiti
wa Bodi ya wadhamini wa CHAPO Kassim Ali Omar, alisema malezi ya pamoja kwa
jamii, ndio msingi mkubwa wa kurejesha heshima na nidhamu kwa watoto.
Hata hivyo,
aliwakumbusha wananchi kila mmoja kuwa mlinzi kwa mwenzake, juu ya mjanga
yaliomo ndani ya jamii, ikiwa ni pamoja na dawa za kulevya na vitendo vya ukatili
na udhalilishaji.
Mapema Masaidizi
wa sheria Jimbo la Chake chake Riziki Ali Hamad, alisema wakati umefike sasa,
kuwepo kwa kamati maalum ya kuhamasisha urithishwaji mara baada ya kifo
kutokezea.
Jumuiya ya
wasaidizi wa sheria wilaya ya Chake chake Pemba CHAPO, inaendelea na mikutano
na makongamano yake, ya kuelekea siku 16 za kupinga ukatili na udhalilishaji,
ambapo inakutana na makundi mbali mbali.
Mwisho
Comments
Post a Comment